70

صوبائی حکومت کسانوں سے گندم کا ہر دانہ خریدے گی تا کہ انہیں آڑھتیوں کے مالی استحصال سے بچایا جا سکے (وزیر خوراک پنجاب)

Spread the love

ساہیوال وزیر خوراک پنجاب سمیع اللہ چوہدری نے کہا ہے کہ صوبائی حکومت کسانوں سے گندم کا ہر دانہ خریدے گی تا کہ انہیں آڑھتیوں کے مالی استحصال سے بچایا جا سکے اور انہیں فصل کا پورا معاوضہ ملے -چھوٹے کسانوں کو گندم فروخت کی ادائیگی کے لئے طریقہ کار بھی سہل کر دیا گیاہے جس سے انہیں بنکوں کے چکر لگانے سے نجات ملے گی اور انہیں فوری ادائیگی ممکن ہو گی -انہو ںنے یہ بات غلہ منڈی میں گندم خریداری مرکز کے دورے کے دوران وہاں موجود کسانوں سے بات چیت کرتے ہوئے کہی -اس موقع پر ڈپٹی کمشنر محمد زمان وٹو ،ڈسٹرکٹ فوڈ کنٹرولر روحیل بٹ ،تحریک انصاف کے رہنما شیخ محمد چوہان اور دیگر متعلقہ افسران بھی موجود تھے -صوبائی وزیر نے سنٹر میں فراہم کی جانے والی سہولیات کا تفصیلی جائزہ لیا اور ابتک کی گندم خریداری کا ریکارڈ بھی چیک کیا -انہو ںنے کہا کہ گندم کے وزن کو درست رکھا جائے تا کہ کسانوں کا مالی نقصان نہ ہو -انہوں نے محکمہ فوڈ کو ہدایت کی کہ خریداری مراکز پر پینے کے ٹھنڈے پانی کا مناسب انتظام کیا جائے اور صوبائی حکومت کی نئی پالیسی کے مطابق خسرہ گرداوری کے بغیر بھی چھوٹے کسانوں کو باردانہ جاری کیا جائے -صوبائی وزیر خوراک سمیع اللہ چوہدری نے رمضان المبارک کے دوران لگائے جانے والے رمضا ن بازاروں اور عوام کو اشیاءضرورت میں ریلیف فراہم کرنے بارے میں بھی تفصیلی بریفنگ لی -ڈپٹی کمشنر محمد زمان وٹو نے بتایا کہ ضلعی انتظامیہ نے عوام کی سہولت کے لئے ضلع بھر میں 5رمضان بازار لگائے گئے ہیں جہاں تمام اشیائے صرف مارکیٹ سے 10سے20فیصد رعایتی نرخوں پر دستیاب ہیں اس کے علاوہ فیئر پرائس شاپس اور مدنی دسترخوانوں کے ذریعے بھی غریب عوام کو ریلیف فراہم کیا گیا ہے -صوبائی وزیر خوراک نے ہدایت کی کہ ان رمضان بازاروں میں پنجاب حکومت کی پالیسی کے مطابق آٹے اورچینی کے فروخت کے علیحدہ سٹال لگائے جائیں اور خواتین ،بوڑھوں اور معذور افراد کے لئے علیحدہ جگہ مختص کی جائے -انہوں نے یہ بھی ہدایت کی کہ ان رمضان بازاروں میں افطاری تک تمام اشیائے صرف کی دستیابی یقینی بنائی جائے تا کہ خریداری کے لئے آنے والے افراد کو کسی قسم کی پریشانی کا سامنا نہ کرنا پڑے-سمیع اللہ چوہدری نے کہا کہ وزیر اعلی سردار عثمان بزدار کی واضح ہدایات کے مطابق صوبائی حکومت رمضان المبارک کے دوران عوام کو ریلیف فراہم کرنے کے لئے تمام ضروری اقدامات اٹھا رہی ہے اور کسی کو بھی ناجائزمنافع خوری اور ذخیرہ اندوزی کی اجازت نہیں دی جائے گی -انہوں نے ڈپٹی کمشنر ساہیوال کو ہدایت کی کہ قیمتوں کو چیک کرنے کے لئے تمام پرائس مجسٹریٹس روزانہ کی بنیاد پر مارکیٹوں کا دورہ کریں اور بڑے سٹورز کو خصوصی طور پر چیک کیا جائے –

اس خبر پر اپنی رائے کا اظہار کریں

اپنا تبصرہ بھیجیں